ჰააგის სამეფოში ქართული პოლიფონიის საღამო გაიმართა
ფესტივალ “ევროპალია-საქართველო” EUROPALIA-ს ფარგლებში, 2023 წლის 28 ოქტომბერს, ჰააგის სამეფო კონსერვატორიის Amare - Den Haag-ის დარბაზში ქართული პოლიფონიის საღამო გაიმართა.შეკრებილი აუდიტორიის წინაშე, სრული ანშლაგით წარსდგნენ საქართველოს სახელმწიფო კამერული გუნდი, გორის ქალთა კამერული გუნდი და ანსამბლი “ბასიანი”.
საკონცერტო პროგრამას წინ უსწრებდა ნიდერლანდებში ქართული დიასპორის წარმომადგენელთა მონაწილეობით ორგანიზებული პრეზენტაციები, რომელთა მსვლელობისას მრავალრიცხოვანი სტუმრები გაეცნენ საქართველოს ისტორიასთან დაკავშირებულ ტრადიციულ ჭედურ ნამუშევრებს, ლიტერატურის ნიმუშებს ნიდერლანდურ ენაზე, ქართული ხალხური რეწვის ნაწარმს, საქართველოში დამზადებულ ხელნაკეთ ნივთებს, სამარკო ღვინოებს და ქართულ სამზარეულოს მრავალფეროვან კერძებს.
კონცერტის ანტრაქტებში მოეწყო ქართული ღვინის დაგემოვნება.